上海闲话｜沈一珠：想起当年菜泡饭_旅游资讯

上海闲话｜沈一珠：想起当年菜泡饭

创始人

2025-05-18 12:41:55

讲到上海人吃的泡饭，其实可以分成白泡饭搭仔菜泡饭。菜泡饭摆了从前，一定是迭种状态：今朝从简，寻点剩菜脚脚头跟冷饭一道烧一滚，混一顿。后来能够进到大餐厅餐单里的龙虾泡饭或者类似佛跳墙迭种菜泡饭，其实跟大多数上海人吃的泡饭已经勿搭界了，只跟餐厅档次有关。

至于白泡饭，应该是从前上海人的日常，急起来，隔夜冷饭，冷开水淘淘就好吃，上世纪五六十年代出生的交关上海人到现在还是欢喜迭能一口；七八十年代出生的上海人可能因为上一代的习惯，残留一点点欢喜；至于再后来出生的上海人，大概一律侪是黄油面包或者是各种健康胶囊了，世界辣了发展，理念也要跟牢，前两天还听到一个专家讲，白粥勿好多吃，伤胃。怪了，从前勿是听医生讲，肠胃勿好，吃两天白粥养一养？想想，世界大同，胃胃却不同，要多学习。

今朝天气好，要准备换季衣裳，冷天衣裳收进去，热天衣裳摆出来，蛮忙。齐巧又有冷饭头，所以，早上就准备烧点泡饭吃吃。不过，起因也是冰箱里翻出一袋剥了好几天的蚕豆，老了，炒出来可能吃口勿好；又正好有咸菜，想想，咸菜豆瓣酥，泡饭过过，应该是绝配。

蚕豆剥成豆瓣，一袋宁波轻盐咸菜，可以分几趟用；开油镬，一小把咸菜摆下去，煸一煸，豆瓣摆下去，摆点糖，一道翻炒均匀，加一碗水，以浸没豆瓣为好，盖镬盖，大中火烧一刻钟左右就好，盛出来撒点葱花提香。

泡饭要烧好就吃，盛出来还是清清爽爽的，饭管饭，水管水，辰光一长，饭米糁涨开了，就变成饭泡粥了。上海人勿欢喜饭泡粥，看到一个人讲闲话啰里巴嗦、颠三倒四，就叫伊“饭泡粥”。

来源：新民晚报作者：沈一珠

上一篇：河南周边旅游攻略游玩痛点化解的贴心指南

下一篇：寻味南京，这些地道的金陵美食，真的好好吃！

上海闲话｜沈一珠：想起当年菜泡饭

相关内容

热门资讯